Dhuchka

Har rishte ka naam hona zaruri to nahin. Hum kabhi chhote se rishte ko bahut bada naam de detein hain. Aur kabhi ek khaas rishte ko bade hi sadharan shabdon mein bayan karte hain. Humare jitne dost hain sabhi hamari zindagi mein ek jaise maine nahin rakhte. Balki har ek dost ke liye apne dil mein alag jagah hoti hai, kyun ki woh bhi ek dusre se alag hote hain. Unke saath humare rishtein bhi alag hote hain magar hum usko ek hi naam mein bayan kar dete hain.."Dosti". Har rishte se maine kuch na kuch sikha hai aur wohi sikh leke aage badhi hoon.

Meri zindagi ka sabse purana rishta...jiska aj taq koi naam nahi de payi magar wo aj bhi bahut kuch maine rakhta hai mere liye. Main tab paanch saal ki thi. Dhuchka naam se bulati thi main unhe. Is naam ka matlab jaise pata nahin waise hi rishte ka naam bhi nahin pata. Is rishte ko dekha jaye to Kabuliwala aur Mini khoki ki yaad zarur aati hai. Hamare deewaar ke saath tambu garke wo rahte the aur sadak banane ka kaam karte the. Haan,ek mazdur admi se mujhe jitna kuch mila, shayad hi kisi aur se mila ho. Main khidki pe chadhke unse baatein karti thi. Pata nahin kya thi wo baatein. Mujhe yeh bhi pata nahin un pe mujhe itna bharosa kyun tha. Bachpan se hi mujhe ghar mein sikhaya gaya tha ke kisi anjaan admi se koi khana mat khana ya phir darwaze ke paas akele mat jana, utha le jayega. Lekin dhuchka jab bhi mujhe deewar ki taraf bula kar kabhi mithai, kabhi Jaynagar ka moa khilata tha...mujhe kabhi darr ka ahsaas nahin hua. Main ghar me bina bataye chhup chhup ke kone mein jake wo sab khati thi. Unhone mujhe kabhi  mele se do jori churiaan lake di to kabhi orange n black combination ka dancing frock, kabhi kaanch ka putla. Mujhe har wo cheez aj taq yaad hai. Ma baba hamesha unhe yeh sab dene ko mana karte the. Lekin wo mayus ho jate the to zyada kuch bola bhi nahin jata tha. Unhone mujhe ek din ek chandi ka haar banwake diya to ma bahut gussa ho gayi. Lekin aj bhi wo mere sabse keemti khazanon mein se ek hain.

Ekdin unke ghar se ek chithhi ayi . Wo padh nahin paye aur ma ko padhke sunane ko kaha. Uske dusre din se ma ne unko padhana shuru kiya. Shaam ko kaam khatam hote hi wo pencil aur kitaabein leke aa jate the hamare ghar padhne. Phir sadak banane ka kaam khatam hua aur wo wapas apne gaon chale gaye.

Humare paas unka koi ata pata nahin tha. Woh nahin aate wapas to phir mulaqaat nahin hoti. Kuch saal baad main jab bara tera saal ki hoon, Dhuchka wapas aye. Humse mile aur humare paros mein rikshaw chalane lage. Zyada din wo kaam bhi unko bhaya nahin aur wo phir wapas chale gaye. Isi dauran mujhe ajeeb ajeeb khayal ate the. Main kabhi kabhi raat mein sochti thi ke jab wo mujhe apni beti ki tarah pyar dete hain to main kyun unhe apne papa ki tarah pyar nahin de sakti. Yehi soch ke kayi raat main royi...
Aksar log pyar de kar wapas na milne par rote hain...lekin shayad tabhi se mere soch kuch ulat pulat se the. Dusro ke dukh mein ro kar mujhe sukoon milta tha. Shayad ye bhi ek ajeeb sa pyar hi tha jiska koi naam nahin. Aur unhi raaton ne mujhe sikha diya ke zaruri nahin tum kisise jitna pyar karo utna hi pyar tumhe unse mile. shayad isi liye tabhi se kisi bhi rishte se mujhe zyada ummeed nahin thi. Is liye jab bhi kisi rishte se kuch achha mila to ummeed se badh kar achha laga aur bura mila to bhi zyada bura...

Dhuchka ki baatein zahan mein hamesha ati thi magar hum unse baat nahin kar pate the. Ma ne unke baare mein ek kavita bhi likhi thi. Kuch dinon pehle wo phir hamare yahan aye. Bara tera saal baad unhe dekha. Dekhne mein thode se kamzor lage. Lekin hasi bilkul waisi hi hai. Unko maine apni acting clippings dikhayi aur unhone kaha ke hume to heroines ko dekhne ke liye paise de kar jana paRta hai...Tum to pehchanne layak nahin rahi... Shayad main pehchanne layak na rahoon lekin Mini khoki ki tarah apne kabuliwala Dhuchka ko pehchanne se kabhi inkaar nahin kar paungi....